Најдобриот сладолед во градот почнал да се продава на 12 јули 1976 година и оттогаш  она што почна како мал семеен бизнис прерасна во еден од најпрепознатливите брендови во Македонија. Приказната за „Палма“ ни ја раскажа Сејбин Бајро, чиј дедо ја основал слаткарницата. „Ова е семеен бизнис што дедо ми му го пренел на татко ми, а татко ми мене. Особено во летниот период, целата фамилија е ангажирана околу Палма, сите членови на семејството - од најмлади до најстари - се тука и секогаш расположени да помогнат“, раскажува Сејбин. Најактивната сезона за „Палма“ почнува во април и трае до септември, а посетеноста во најголема мера зависи од временските услови. Сејбин го издвојува мај, кога сонцето ги мами луѓето да излезат на прошетка, да се расположат и да се почестат со неколку топки сладолед.  

-Во времето кога е отворена „Палма“ ова било шеталиште каде што многу луѓе се запознале, излегувале, па и се зеле, а еве денес сè уште доаѓаат тука со своите деца и внуци. Сега меѓу редовните муштерии има синови и ќерки на муштерии што ја посетувале „Палма“ од самите почетоци - раскажува Сејбин. Неговиот дедо навистина визионерски избрал локација каде што порано немало ниту една зграда и каде што по толку години се задржал шармот на зелена шетачка оаза меѓу бетонските структури. 

  Рецептот не е променет                                                           

Тајната на успехот и долговечноста на „Палма“ секако лежи во тајната на извонредниот рецепт за сладолед. Но Сејбин истакнува дека двата основни предуслова за добро работење се беспрекорната хигиена и пријатната услуга. - Ако сакаш да си број 1 мора да ги следиш новитетите и не смееш да тапкаш во место. Сладоледот останува ист, но постојано се модернизираме во поглед на машините, ентериерот, изгледот на терасата - вели тој. Благодарение на внимателниот избор на материјали, „Палма“ не ќе има потреба да се менува со воведувањето на ХАССП-системот, кој во поглед на хигиената отсекогаш го исполнува. Овде постојано се следат трендовите и во поглед на нови видови сладолед, па затоа сега има избор меѓу 30 прекрасни вкусови. - Рецептот на дедо ми воопшто не е променет. Сладоледот секогаш е ист, ванилата е онаа истата што се служела пред 30 години. Постарата генерација муштерии најчесто ги нарачува истите стандардни вкусови што ги јаделе уште од почетокот, а младите се расположени да пробаат сè што е ново. Исто така, пред 6-7 години почнавме и продажба на сладолед и зиме. Времињата се променија, па она што порано беше незамисливо сега стана вообичаено: и зиме да се дојде на сладолед - објаснува Сејбин.